काठमाडौँ । गायन रियालिटी शो ‘नेपाल आइडल’ सिजन ६ को उपाधि सिन्धुपाल्चोककी गंगा सोनामले जितेकी छन्।
आइतबार राति ललितपुरको ग्वार्कोस्थित रोयल टुलिप होटलमा सम्पन्न ग्राण्ड फिनालेमा अन्य चार प्रतिस्पर्धीलाई पछि पार्दै उनले विजेता बनेकी हुन्।
गंगा नेपाल आइडल विजेता बन्ने दोस्रो महिला बनेकी छन्। यसअघि सिजन ३ मा सज्जा चौलागाईं पहिलो महिला विजेता बनेकी थिइन्।
गंगाले उपाधिसँगै ट्रफी, नगद २५ लाख रुपैयाँ र विभिन्न उपहार प्राप्त गरिन्।
यस सिजनमा सिक्किमकी बबिता थापा मगर फर्स्ट रनरअप भइन्। उनले नगद १० लाख रुपैयाँ जितिन्। चितवनकी दर्शना गान्धारी सेकेन्ड रनरअप भइन् र उनले नगद ५ लाख रुपैयाँसहित उपहार प्राप्त गरिन्।
दार्जिलिङका अभिनय खाति चौथो र काठमाडौंकी मृनल मानन्धर पाँचौं बने। उनीहरूले १–१ लाख रुपैयाँ पुरस्कार पाए।
फिनालेमा निर्णायक मण्डलमा न्ह्यू बज्राचार्य, कालीप्रसाद बाँस्कोटा र इन्दिरा जोशी रहेका थिए भने आसिफ शाहले उद्घोषण गरेका थिए। शोको निर्देशन सुरेश पौडेल र एलेन श्रेष्ठले गरेका हुन्।
नेपाल आइडलको यसअघि बुद्ध लामा, रवी ओड, सज्जा चौलागाईं, भूपेन्द्र थापा मगर र करण परियार विजेता बनेका थिए।
