निष्पक्ष निर्वाचनका लागि तनहुँ प्रशासनको टोल–फ्रि सेवा, ‘त्रि–घेरा’ सुरक्षा कडाइ
अमरराज नहर्की
तनहुँ, फागुन २० गते
भोलि फागुन २१ गते हुने प्रतिनिधिसभा सदस्य निर्वाचन–२०८२ लाई स्वच्छ, निष्पक्ष र भयमुक्त वातावरणमा सम्पन्न गर्न जिल्ला प्रशासन कार्यालय तनहुँले टोल–फ्रि नम्बर सञ्चालनमा ल्याएको छ । निर्वाचन अवधिमा हुन सक्ने अवाञ्छित गतिविधि नियन्त्रण गर्न तथा नागरिकका गुनासा र जिज्ञासा तत्काल सम्बोधन गर्न १८१०५०००३८८ नम्बरको सेवा सुरु गरिएको हो ।
सहायक प्रमुख जिल्ला अधिकारी दीपक रेग्मीले जारी गरेको सूचनामा निर्वाचनसँग सम्बन्धित सूचना आदान–प्रदान तथा उजुरी दर्ताका लागि उक्त नम्बर प्रयोग गर्न आग्रह गरिएको छ । यो सेवामा सम्पर्क गर्दा कुनै शुल्क नलाग्ने जनाइएको छ । नागरिकको सहज पहुँचमार्फत निर्वाचन प्रक्रियालाई थप पारदर्शी र सुरक्षित बनाउने उद्देश्य राखिएको प्रशासनको भनाइ छ ।
निर्वाचनलाई भयरहित र मर्यादित बनाउन जिल्लाभर एकीकृत सुरक्षा योजना लागू गरिएको छ । प्रमुख जिल्ला अधिकारी शिवलाल तिवारीका अनुसार सबै मतदान स्थलमा सुरक्षाकर्मी परिचालन भइसकेका छन् भने संवेदनशील क्षेत्रहरूमा निगरानी बढाइएको छ । नेपाल प्रहरी, सशस्त्र प्रहरी र नेपाली सेनाको संयुक्त ‘त्रि–घेरा’ सुरक्षा योजना कार्यान्वयनमा रहेको उहाँले बताउनुभयो ।
जिल्लामा २ लाख ५४ हजार ३९७ मतदाताका लागि १४४ मतदान स्थलअन्तर्गत ३०९ स्थायी र २ अस्थायी गरी कुल ३११ मतदान केन्द्र तोकिएका छन् । भौगोलिक अवस्था र सुरक्षा चुनौतीका आधारमा ८ मतदान केन्द्रलाई अति संवेदनशील सूचीमा राखी विशेष सुरक्षा प्रबन्ध गरिएको छ ।
प्रशासनले मतदातालाई निर्धक्क र उत्साहपूर्वक मतदानमा सहभागी हुन आह्वान गर्दै सादा पोसाकका सुरक्षाकर्मी र मोबाइल गस्ती टोलीसमेत सक्रिय रहेको जनाएको छ । सुरक्षित, व्यवस्थित र मर्यादित मतदानका लागि आवश्यक सबै तयारी पूरा भएको प्रशासनको दाबी छ ।
