दमौली । तनहुँको आँबुखैरेनी गाउँपालिका-३ आँबुगाउँस्थित भित्री सडकखण्डमा आज साँझ भएको बोलेरो जीप दुर्घटनामा छ जना घाइते भएका छन् । घाइतेमध्ये एक जनाको अवस्था गम्भीर रहेको जिल्ला प्रहरी कार्यालय तनहुँका प्रहरी नायब उपरिक्षक श्रवणकुमार विकले जानकारी दिए ।
घाइते हुनेमा चितवनको इच्छाकामना गाउँपालिका-२ बस्ने २० वर्षीया दोमाया गुरुङ, सोही ठाउँ बस्ने २६ वर्षीय जितबहादुर गुरुङ, १६ वर्षीया भावना गुरुङ, २५ वर्षीय अचित गुरुङ, कालिका नगरपालिका-८ बस्ने ३४ वर्षीया सरस्वती गुरुङ, इच्छाकामना गाउँपालिका-५ बस्ने ३१ वर्षीय पुष्पलाल श्रेष्ठ रहेको प्रहरी नायब उपरिक्षक विकले बताए ।
छिम्केश्वरीबाट आँबुखैरेनीतर्फ आउँदै गरेको से १ च ६५१ नम्बरको बोलेरो जीप चालकले नियन्त्रण गुमाइ सडकमा पल्टिदा छ जना घाइते भएको तनहुँ प्रहरीले जनाएको छ ।जीपमा ११ जना सवार रहेका मध्ये चालक सहित अन्य पाँच जना यात्रु भने सकुशल छन् ।
घाइतेहरुको आँबुखैरेनी अस्पतालमा उपचार भइरहेको छ ।
