कीर्तिपुरस्थित टीयू अन्तर्राष्ट्रिय क्रिकेट स्टेडियममा बुधबार भएको खेलमा चितवन राइएनोजले विराटनगर किंग्सलाई ४८ रनले पराजित गरेको हो ।
चितवनले दिएको १७५ रनको लक्ष्य पछ्याएको विराटनगरले १६.५ ओभरमा सबै विकेट गुमाएर १२६ रन मात्र बनायो ।
विराटनगरका लागि लोहर अर्डका मर्चेन्ट डे लाङले ३९ रन बनाए । त्यस्तै, प्रतिश जिसीले ३० रन बनाए भने साम हिजलेटले २२ रन जोडे ।
चितवनका रन्जित कुमारले ४ ओभरमा २१ रन खर्चेर ५ विकेट लिए । त्यस्तै, कमल सिंह ऐरीले २ विकेट लिए भने सोहेल तनविर, सैफ जैब र कप्तान कुशल मल्लले समान एकरएक विकेट लिए ।
त्यसअघि टीयु क्रिकेट मैदानमा टस हारेर ब्याटिङको निम्तो पाएको चितवनले निर्धारित २० ओभरमा ४ विकेट गुमाएर १७४ रन बनाएको थियाे ।
चितवनका लागि रवि बोपाराले सर्वाधिक ६५ रन बनाए । उनले ३८ बलमा ३ चौका र ४ छक्का प्रहार गरे । बोपाराले लगातार तेस्रो खेलमा अर्धशतक बनाएका हुन् ।
त्यस्तै, कप्तान कुशल मल्लले २० रन, सैफ जैबले ३२ रन, दीपक बोहराले ५ रन, डविड मलानले १७ रन र देव खनालले २८ रन बनाए ।
बलिङमा विराटनगरका कप्तान सन्दीप लामिछाने र मार्चेट डि लिङ्गेले समान २–२ विकेट लिए । शुभव रन्जनेले एक विकेट लिए ।
