काठमाडौं । नेपाल प्रिमियर लिग (एनपीएल) सिजन-२ मा कर्णाली याक्समाथि विराटनगरले रोमाञ्चक जित निकालेको छ । कर्णालीले दिएको १६१ रनको लक्ष्य विराटनगरले एक बल बाँकी छँदा ७ विकेट गुमाएर पूरा गरेको हो ।
विराटनगरका लागि बसिर अहमदले ४३ बलमा ६२ रन बनाए । त्यस्तै, लोकेश बम ६, साम हिजलेट १६, शाहिल पटेल १९, मार्चेन्ट डि लिङ २, नारायण जोशी २५, प्रतिश जिसी ६ रन, कप्तान सन्दीप लामिछाने ६ रन बनाए ।
बलिङमा कर्णालीका कप्तान सोमपाल कामी र गुल्सन झाले दुई/दुई विकेट लिए । पवन सरार्फ, नन्दन यादव र विलियम बोसिष्टोले एक/एक विकेट लिए ।
कीर्तिपुरस्थित त्रिवि मैदानमा दिनको दोस्रो खेलमा टस जितेर पहिले ब्याटिङ गरेको कर्णालीले ३ विकेटको क्षतिमा १६० रन बनाएको थियो ।
कर्णालीका लागि ओपनर प्रियांक पाञ्चालले अर्धशतक प्रहार गरे । उनले ६३ रन बनाए । ओपनिङमा आएका मार्क वाट ६ रनमा क्याच आउट भए ।
यस्तै गुल्सन झाले २० रन, विल बोसिस्टोले नटआउट ४८ रन, नाजिबुल्लाह जाद्रानले १२ रन बनाए ।
बलिङमा डि लाङ र कप्तान सन्दीप लामिछानेले १–१ विकेट लिए ।
