काठमाडौं । सुदूरपश्चिम रोयल्सले नेपाल प्रिमियर लिग (एनपीएल) सिजन–२ मा लगातार पाँचौं जित निकालेको छ ।
शनिबार भएको खेलमा जनकपुर बोल्ट्सले दिएको १४६ रनको लक्ष्य सुदूरपश्चिम रोयल्सले १७ ओभर ४ बलमा ४ विकेट गुमाएर पूरा गरेको हो ।
यससँगै, सुदूरपश्चिम एनपीएलमा प्लेअफ पुग्ने पहिलो टोली समेत बनेको छ । साविक विजेता जनकपुर बोल्ट्सलाई हराउँदै लगातार पाँचौं जित सहित साविक उपविजेता समेत रहेको सुदूरपश्चिमले लिग चरणमा दुई खेल खेल्नु अगावै शीर्ष चारमा स्थान पक्का गर्दै प्लेअफमा स्थान बनाएको हो ।
आज भएको खेलमा सुदूरपश्चिमका लागि इशान पाण्डेले अर्धशतक बनाए । उनले ३५ बल खेल्दै ५ चौका र १ छक्का प्रहार गर्दै ५६ रन बनाए ।
त्यस्तै, विनोद भण्डारीले ४२ रन र क्रिस लिन १ रनमा आउट भए भने कप्तान दीपेन्द्रसिंह ऐरी १० रन र हर्मित सिंहले २५ रन बनाए ।
बलिङमा जनकपुरका माज सदाकतले २ विकेट लिए । त्यस्तै, सञ्जय कृष्णमूर्ति र आदित्य मेहताले एक–एक विकेट लिए ।
यसअघि टीयु क्रिकेट मैदानमा टस जितेर पहिला ब्याटिङ गरेको जनकपुरले निर्धारित २० ओभरमा ८ विकेट गुमाएर १४५ रन बनाएको थियाे ।
जनकपुरका लागि सञ्जय कृष्णमूर्तिले ३८ बलमा २ चौका र २ छक्का सहित अर्धशतक प्रहार गरे । त्यस्तै, जोन निकोल लोफ्टी इटन ३९, माज सदक्वात १२, मयन यादव ६, आदित्य मेहता १५ र वायन पार्नेल १४ रनमा आउट भए ।
बलिङमा सुदूरपश्चिमका अभिनास बोहराले ४ विकेट लिए । त्यस्तै, स्कट कुइगेलेइनले ३ विकेट लिए भने कप्तान दीपेन्द्रसिंह ऐरीले एक विकेट लिए ।
