मंसिर २७ शनिबार ।
तनहुँ भानु।
भाषणमा ‘जेनजी’, व्यवहारमा ‘वृद्धाश्रम’ ! गण्डकी मा पनि अधिकांश तिनै ‘टेस्टेड’ अनुहारको हालीमुहाली।
नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माले सार्वजनिक मञ्चहरूमा जतिसुकै ‘पुस्तान्तरण’, ‘रूपान्तरण’ र ‘नेतृत्व हस्तान्तरण’ को कुरा उठाएपनि उम्मेदवार सिफारीसमा भने तल्ला कमिटीले उनीहरुको आवाजलाई लत्याइदिएका छन् ।
आगामी फागुन २१ गते हुने भनिएको निर्वाचनका लागि कांग्रेसले धमाधम उम्मेदवार सिफारिस गरिरहँदा गण्डकी प्रदेशका अधिकांश जिल्लामा ‘जेनजी’ (नयाँ पुस्ता) को उपस्थिति शून्यप्रायः देखिएको छ । ‘जेनजी’ आन्दोलनले राजनीतिमा पुस्तान्तरण र परिवारवादको अन्त्यको बहस छेडे पनि कांग्रेसको तल्लो तहबाट आएका सिफारिस सूचीमा ७० वर्ष कटेका, बारम्बार मन्त्री बनेका र पटक–पटक परीक्षण भइसकेका ‘टेस्टेड’ अनुहारकै हालीमुहाली देखिएको छ। केही जिल्लाबाहेक सबैतिरबाट आएका नामहरूले कांग्रेसभित्र नयाँ पुस्ताको प्रवेशमा अघोषित प्रतिबन्ध नै लागेको जस्तो भान गराउँछ ।
सबैभन्दा रोचक र उदेकलाग्दो दृश्य तनहुँ क्षेत्र नम्बर १र २ मा पनि देखिएको छ । पटक पटक /सांसद र मन्त्री बनिसकेकाहरुको एकल सिफारिसका लागि जोडबल गरिएको थियो । ‘जेनजी’ आन्दोलनले पुस्तान्तरणसँगै ‘नेपो बेबी’ (नातावाद) को अन्त्य हुनुपर्ने आवाज उठाएको थियो । सक्षम युवालाई पाखा लगाउने यो प्रवृत्तिले कांग्रेसभित्रको ‘जेनजी’ सेन्टिमेन्टमाथि कुठाराघात गरेको टिप्पणी तनहुँका काँग्रेस प्रति आशा,भरोसा र बिश्वास राख्ने निष्ठावान र इमानदार कार्यकर्ताहरूले गर्न थालेका छन् ।
नेपाली कांग्रेसले २०७९ सालको निर्वाचनमा समानुपातिकतर्फबाट निर्वाचित भएका व्यक्तिहरूलाई यस पटक समानुपातिक उम्मेदवार बन्न नपाउने नियम बनाएपछि प्रत्यक्षतर्फ आश गरेका केही नेताहरूलाई व्यवस्थापन गर्न पनि समस्या भएको छ ।
