मुग्लिङ–मलेखु सडक विस्तारमा सुस्तता : साढे तीन वर्षमा ४३ प्रतिशत मात्रै काम
वैशाख १२ गते ।
काठमाडौँ जोड्ने मुख्य लाइफलाइन मानिने पृथ्वी राजमार्ग अन्तर्गत मुग्लिङ–मलेखु सडकखण्ड विस्तारको कार्य सुस्त देखिएको छ । साढे तीन वर्ष अगाडिबाट सुरु भएको यस आयोजनाको हालसम्म ४३ प्रतिशत मात्रै भौतिक प्रगति भएको छ ।
मलेखुपूर्वको सडक विस्तारले गति लिइरहँदा पश्चिम खण्ड (मुग्लिङ–मलेखु) मा भने निर्माण सामग्रीको अभाव र स्थानीय अवरोधका कारण काम प्रभावित भएको हो ।
किन भइरहेको छ ढिलाइ?
नागढुङ्गा–मुग्लिङ सडक योजना (पश्चिम खण्ड) की प्रमुख सजना अधिकारीका अनुसार आयोजनाले सुरुदेखि नै विभिन्न समस्या झेल्दै आएको छ। उहाँ भन्नुहुन्छ, “सुरुमा डिजाइन, त्यसपछि घरटहरा र बिजुलीका पोल हटाउने समस्या आयो । अहिले मुख्य समस्या निर्माण सामग्रीको छ । मलेखु क्षेत्रका खोलाबाट सामग्री उठाउन नदिँदा निर्माण कम्पनीलाई काममा दबाब दिन सकिने अवस्था छैन ।”
स्थानीय अवरोध र मूल्यवृद्धि मुख्य चुनौती:
आयोजनाका सूचना अधिकारी सचेन्द्र मिश्रका अनुसार वातावरणीय प्रभाव मूल्याङ्कन (EIA) ले अनुमति दिएको लामाबगर क्षेत्रबाट गिट्टी, बालुवा निकाल्न स्थानीय र स्थानीय सरकारले अवरोध गरिरहेका छन् । पटक–पटकको वार्ताबाट पनि समाधान निस्कन सकेको छैन । त्यस्तै, पछिल्लो समय भएको मूल्यवृद्धिले पनि निर्माणमा थप चुनौती थपेको छ ।
कहिले भएको थियो सम्झौता?
मुग्लिङदेखि मलेखुसम्मको ३८.८६ किलोमिटर सडक खण्ड विस्तारका लागि शर्मा–जेडआइसीजी जेभीसँग २०७९ मङ्सिर ७ गते ठेक्का सम्झौता भएको थियो । हाल यस खण्डमा ढल निर्माण र सडक पेटीको काम भइरहे पनि सन्तोषजनक प्रगति हुन सकेको छैन ।
धादिङका प्रमुख जिल्ला अधिकारी विजयराज सुवेदीले स्थानीयको अवरोध हटाउन पहल भइरहेको बताए पनि जनप्रतिनिधिबाट अपेक्षित सहयोग नमिलेको आयोजनाको गुनासो छ ।
प्रेस प्रमुख ।
